Allhamdulillah pujoe keu Tuhan
Nyang peugöt alam mandum seureuta
Teuma seulaweut ateuh janjôngan
Pang ulée alam Rasul Anbiya
Jinoe lôn peugah wahé e taulan
Bicah geulumbang lam laôt raya
Hikayat lôn tuléh peu puléh badan
Keu rakan-rakan gampông ngön kuta
Bak binèh panté cama teureubang
Leumah Po pulan meujaréng kadra
Sudông bak ulèe galah na sajan
Lam jalô sampan bak mieng kuala
Ie pih ka paseung wahé e cut bang
Eungkôt meukawan lam krueng meuputa
Leumah môto bôt ramé meurakan
Keudéh tujuan lam laôt raya
Jak mita eungkôt beungöh ngön malam
Wahé e tuan mita beulanja
Eungkôt leumpah le lam krueng Tuhan
Meu macam-macam nyôe tatém rika
Jinôe lôn atoe ulôn seubôtkan
Padum bôh macam dari mieng kuala
Na ciriek buju mangat ta payéh
Laen lôm cabéh ngön eungkôt mirah mata
Eungkôt kansiblah wahé e taulan
Menurôt khabaran na keuh calitra
Nabi nyang pajôh nyan siblah badan
Sisa jih tuan geutiek lam kuala
Han soe ék pike karônya Tuhan
Eungkôt nyan tuan udép lôm teuma
Meunan calitra masa sabôh jan
Eungkôt nyan rakan jinoe mantöng na
Eungkôt kanteung’a na syiet hai tuan
Nyang jak meukawan si eungkôt kadra
Eungkôt kangapah ngön eungkôt asèkap
Bak kawé jikap mangat tarasa
Yang jareung that na, na keuh eungkôt c’uet
Umpeun jih ji u’et pupr’ét bak mata
Yang leumpah teuga kawé jeut linuet
Nyôe rôh bagôk uet padôk-padôk meuputa
Laen lom tuan jinoe ulôn suet
Jéh ungkôt kanthuep mangat tarasa
Ungkôt siridéng abéh umpeun ji’uet
Jéh apa su’ut meupèp-pèp meubura
Nibak si uroe jéh apa su’ut
Kawé göt linuet bak mieng kuala
Geu kareuh laju meu cudhuet-cuduet
Haté meu dhap-dhuep sang ungkôt u bé raya
Rukôk bak babah karap jeut teu ‘uet
Geuharap eungkôt beurôh lam raga
Ban trôk u darat ka keunöng peungeut
Rupa jih ka bukuem juruet pruet u bé raya
Emperom, Banda Aceh
Fuady Keulayu, lahir Meureudu Pidie Jaya. Menulis Hikayat dan biasa melantunkannya dengan biola. Menjabat sebagai kepala devisi Hikayat dan pendiri Band Indie “Seungkak Malam Seulanyan”, di Komunitas Kanöt Bu, Banda Aceh.
[PM 008]
Belum ada komentar